Guddoomiyaha odayaasha dhaqanka beelaha Hawiye Nabadoon Maxamed Xasan Xaad ayaa ka hadlay muddo kororsiga cusub ee golayaasha dowladda federaalka Soomaaliya ay qorsheynayaan.
Nabadoon Xaad ayaa ku goodiyey in ciidan badbaado qaran ah ay mar kale abuuri doonaan, hadii dowladaan ay ku dhaqaaqdo muddo kororsi, sida uu carabka ku adkeeyey Nabadoon Xaad.
“Xasan Sheekh muxuu ku yimid? Badbaado Qaran ayuu ka mid ahaa, hadda muddo kororsi hadii ay ku dhaqaaqdo dowladiisu, afarta sano ayuu weynayaa walaahi,” ayuu yiri Nabadoon Maxamed Xasan Xaad.
Guddoomiye Xaad ayaa baarlamaanka dalka uga digay inay ku dhaqaaqaan tallaabo aan lagu heshiin, “Baarlamaan, walaa madaxweyne, cid sameyn karta wax aan lagu heshiin ma jirto,” ayuu ku goodiyey Xaad.
Ugu dambeyntii Nabadoonka ayaa ku goodiyey in ciddii ku dhaqaaqda muddo kororsi ay la kulmi doonto wixii ay la kulmeen kooxdii Farmaajo ee awooda ciidan looga hor istaagay muddo kororsiga.
