Hoggaamiyaha xisbiga Dimuqraadiyiinta Iswiidhan (SD), Jimmie Åkesson, ayaa ku baaqay in si ku meel gaar ah loo joojiyo masaafurinta dhalinyarada, ilaa laga helo hab sharciyeed oo oggolaanaya in xaalado gaar ah laga reebo.
Åkesson ayaa wareysi uu siiyay wargeyska Dagens Nyheter ku yiri: “Waxaan u maleynayaa in tani ay tahay tan ugu macquulsan, halkii laga degdegi lahaa xal cusub oo laga yaabo inuusan sidoo kale gaarin hadafka.”
Xisbiyada heshiiska Tidö ayaa hore u diiday soo jeedin ay mucaaradku ku gudbiyeen guddiga baarlamaanka ee caymiska bulshada, taasoo ku saabsan joojin ku meel gaar ah oo lagu sameeyo masaafurinta dhalinyarada.
Xisbiyada dowladda ayaa sheegay inay iyaguna diyaarinayaan soo jeedin cusub oo lagu xallinayo arrimahan, kuwaas oo dhaliyay dhaleeceyn xooggan oo loo jeediyay siyaasadda adag ee socdaalka ee dowladda.
Sahan ra’yi ururin ah ayaa sidoo kale muujiyay in aqlabiyad weyn oo ka mid ah codbixiyeyaasha Iswiidhan ay taageersan yihiin in la joojiyo masaafurinta dhalinyarada, iyadoo dib loo soo celinayo mabda’a “xaaladaha bini’aadantinimo ee gaarka ah” ee ku jira sharciga ajaanibta.
