2Stockholm – Mas’uuliyiinta caafimaadka ee Yurub ayaa ku dhawaaqay inuu dillaacay cudurka Salmonella oo laga helay 14 dal oo Yurub ah, kuwaas oo ay ku jirto Iswiidhan, iyadoo cudurka lala xiriirinayo baastooyinka degdegga ah ee dhadhanka leh (instant noodles).
Ilaa hadda waxaa la diiwaangeliyay 106 qof oo cudurka qaaday, kuwaas oo intooda badan ah carruur iyo dhalinyaro. Kiisaskii ugu horreeyay ayaa la ogaaday bishii Nofeembar ee sannadkii hore.
Hay’adda Badbaadada Cuntada ee Yurub (EFSA) iyo Xarunta Yurub ee Ka Hortagga iyo Xakamaynta Cudurrada (ECDC) ayaa sheegay in baastooyinka degdegga ah ee dhadhanka leh ay yihiin isha ugu badan ee looga shakisan yahay faafitaanka cudurkan.
Hay’adaha ayaa sidoo kale sheegay in cudurka lala xiriirin karo alaab laga soo saaray dalka Ukraine, inkastoo aan la shaacin magacyada dukaamada ama shirkadaha tafaariiqda ee iibiyay.
Shirkadda Reeva Foods ayaa toddobaadkii hore xaqiijisay inay bakteeriyada Salmonella ka heshay qayb ka mid ah baastooyinka degdegga ah ee lagu soo saaray Ukraine, kuwaas oo loo qaybiyay suuqyada dalalka Baltiga.
Shirkaddu waxay sheegtay in baaritaan rasmi ah uu socdo, isla markaana dhammaan alaabtii ay dhibaatadu saameysay laga saaray suuqyada si loo ilaaliyo badbaadada macaamiisha.
