Dowladda Sacuudiga ayaa ka cafisay xukun dil ah shan xubnood oo lala xiriirinayo dilkii wariyihii reer Sacuudi Jamal Khashoggi loogu geystay dalkaasi Turkiga labo sano ka hor.

Xubnahan ayaa xukunkooda loogu badalay min 20 sano oo xarig ah, halka saddex kalena lagu xukumay xabsi u dhaxeeya 7-10 sano.

Cidna lama shaacin magacooda xubnahan siddeeda ah ee xukunnada ay ku ridday maxkamadda, waana maxkamadeyntii labaad ee ay maraan.

Qoyska wariyaha la dilay ayaa horay u sheegay in ay cafiyen ciddii dishay Khashoggi.

Hatice Cengiz oo aheyd gabar u doonannayd suxufiga la diley oo ahaa mucaaradka Sacuudiga, ayaa ku cambaareysay maamulka Sacuudiga xukunnada kama dambaysta ah ee la xidhiidha dilkii labo sano ka hor looga geystay magaalada Istanbul seygeeda.

Madaxtooyada Turkiga ayaa sidoo kale dhaleeceysay xukunka, waxayna sheegeen in xukunkani ka hooseeyo rejadii Turkiga iyo Beesha Caalamka.

Dacwad oogaha guud ee dalkaas wuxuu sheegay in raggaas lagu riday 20 sano oo xarig ah maadama qoyska weriyaha ay cafiyeen.

Halka maxkamaddu ay ayidday xukun u dhexeeya 7 ilaa 10 sano oo lagu riday saddex qof ee kale.

Khashoggi oo si weyn u dhaleecen jiray xukuumadda Sucuudiga ayaa lagu dilay gudaha qunsuliyadda boqortooyada ee Istanbul ee dalka Turkiga, waxaana la rumeysan yahay in ay dilkaasi fuliyeen sirdoonka Sacuudiga.

Leave a Reply

Your email address will not be published. Required fields are marked *

*