Koonfurta Stockholm waxaa ka dhacday dhacdo amni oo culus oo ku dhammaatay geerida nin ay booliisku toogteen, kaddib markii looga shakiyay inuu afduubtay saddexdiisa carruur ah isla markaana uu ku hanjabay inuu dili doono. Dhacdadan ayaa la xiriirtay muran dhinaca mas’uuliyadda iyo xannaanada carruurta ah oo kala dhexeeyay xaaskiisii hore.
Sida uu Qoray wargeyska Aftonbladet, ninku wuxuu carruurta la baxay kaddib muran dhex maray isaga iyo hooyadood oo markii hore gaariga kula jirtay. Wararka ayaa sheegaya inuu isku dayay inuu gaariga ku jiirsiiyo xaaskiisii hore markii ay ka degtay gaariga, ka hor inta uusan carruurta la baxsan.
Muddo yar kaddib ayuu hooyada carruurta u sheegay taleefan ahaan inuu doonayo inuu dilo carruurta, taasoo keentay inay la xiriirto adeegyada degdegga ah.
Booliiska ayaa helay wargelinta fiidnimadii Talaadada, waxayna bilaabeen raadinta gaariga. Markii la ogaaday goobta uu ku sugnaa waqooyiga Nynäshamn, waxaa bilaabatay baacsasho socotay dhowr daqiiqo, taasoo ku dhammaatay markii gaarigu ku dhacay xayndaabka dhexe ee waddada weyn ee 73.
Afhayeenka xarunta taliska booliiska, Karina Skagerlind, ayaa sheegtay in gaarigu ku socday xawaare sare waddada weyn ka hor inta aysan dhacdadu ku dhammaan shilka.
Sida laga soo xigtay Aftonbladet, markii booliiska ugu horreeyay ay gaareen gaariga, ninku wuxuu isku dayayay inuu mindi ku waxyeelleeyo carruurta ku fadhiday kursiga dambe. Mid ka mid ah saraakiisha booliiska ayaa markaas rasaas ku furay, taasoo sababtay dhaawac dhimasho ah.
Laba ka mid ah carruurta ayaa dhaawacmay intii ay dhacdadu socotay, waxaana loo qaaday isbitaal si loogu daweeyo. Booliiska ayaa weli wada baaritaan ku saabsan dhammaan faahfaahinta dhacdada.
