Iibka ay dadka Sweden ka sameeyaan Mareykanka, Shiinaha iyo dalal kale oo ka baxsan Midowga Yurub ayaa noqon doona mid qaali ah laga bilaabo 1-da Luulyo, iyadoo la dhaqan-gelinayo khidmadaha kastamka ee cusub ee lagu soo rogay baakadaha qiimahoodu hooseeyo.
Khubaradda sharciga macaamiisha ee ururka Macaamiisha Sweden, Maria Wiezell, ayaa wakaaladda wararka TT u sheegtay in khidmadahan cusub ay saameyn karaan xitaa qaar ka mid ah dalabaadka la sameeyay ka hor inta aan sharcigu dhaqan gelin.
Waxay tiri: “Sharcigu wuxuu dhaqan galayaa 1-da Luulyo. Haddii aad badeecad dalbatay ka hor taariikhdaas balse aysan dalka soo gelin ka hor 1-da Luulyo, waxaa lagu dari karaa khidmadaha cusub.”
Xeerarkan cusub waxay khuseeyaan badeecooyinka qiimahoodu gaarayo ilaa 150 euro.
Khidmadda aasaasiga ah waa 3 euro, oo u dhiganta qiyaastii 33 karoon oo Swedish ah, balse qiimaha kama dambaysta ah ayaa kordhi kara iyadoo ku xiran waxa ku jira baakadda.
Maria Wiezell ayaa sheegtay: “Haddii aad hal baakad ku wada dalbato tusaale ahaan shaati iyo kabo, oo ah laba nooc oo badeecooyin kala duwan ah, waxaa dhici karta in khidmaddu laba jeer lagu saaro.”
Inkasta oo tallaabadani kordhinayso kharashaadka macaamiisha, haddana Wiezell waxay u aragtaa go’aanka mid wanaagsan.
Waxay tiri: “Waxaan aragnay qulqul badan oo baakado yaryar ah oo ka imanaya dalalka Aasiya, gaar ahaan badeecooyin aan buuxin shuruudaha badbaadada iyo xeerarka kiimikooyinka ee aan halkan ku leenahay. Sidaas darteed waa muhiim in la qaado tallaabooyin lagu yareynayo ganacsiga aan daruuriga ahayn.”
