Madaxweynaha dalka Chad  Idriss Deby ayaa lagu soo waramayaa in lagu dilay dalkaasi, sida ay warbaahinta ka sheegeen saraakiil ka tirsan ciidamada.

Madaxweynaha ayaa u geeriyooday dhaawac kasoo gaaray weerar kusoo qaadeen jabhadda Front ee dalkaasi ka jirta xilli ay dagaal kala hortageen ciidamo uu isaga hoggaaminayay.

Idiriss Deby ayaa maalintii isniinta lagu dhawaaqay in uu mar lixaaad ku guuleystay doorasho ka dhacday dalkaasi.

Madaxweynaha la dilay ee Chad Idriss Deby Itno, ayaa xukunka hayey in ka badan 30 sano, waxaana maanta uu u geeriyooday dhaawac soo gaaray isaga oo ka qeyb qaadanaya dagaal ay dowladda kula jirto mucaaradka oo ka socda waqooyiga dalkaas, waxaa sidaas sheegay ciidamada.

Deby, “ayaa hadda neefsaday neeftii ugu dambeysay ee difaaca madax-banaanida dalka, isaga oo ku sugan jiidda hore ee dagaalka,” waxaa sidaas war-saxaafadeed laga aqriyey taleefishinka dowladda ku yiri afhayeenka ciidamada General Azem Bermandoa Agouna.

Deby ayaa Isniintii sheegay inuu tegayo jiidda hore ee dagaalka, si uu ugu biiro ciidamada la dagaalamaya “argagixisada,” waxaana lagu dhaawacay booqashadaas.

Mucaaradka Chad oo fadhiggoodu yahay jiidda waqooyi ee Libya ayaa maalinkii doorashada soo weeraray xuduudda, waxayna boqolaal km kusoo siqeen koonfurta dalka.

Deby oo 68 sano jir ahaa ayaa xukunka ku yimid kacdoon dhacay 1990-kii, wuxuuna ahaa mid ka mid ah hoggaamiyayaasha ugu muddada dheer Afrika. Waxaa mar kale la shaaciyey inuu markii lixaad xilka madaxweynaha ku guuleystay, Isniintii shalay.