Warbixin ay soo saartay Hay’adda xuquuqda aadanaha u dooda ee Amnesty International ayay ku sheegtay in duqeymo mataano ah oo ay fuliyeen militariga Soomaaliya, oo adeegsanaya diyaaradaha aan duuliyaha lahayn ee Turkiga, lagu dilay dad rayid ah oo ay carruur ku jirtey.
Hay’ada ayaa sheegtay in 23 qof oo rayid ah, oo ay ku jiraan 14 carruur ah, duqeyn lagu diley bishii Maarso,deegaan ka mid ah gobolka Sh/hoose waxayna hay’addu ku baaqday in baaritaan lagu sameeyo.
Amnesty ayaa warbixinteeda ku sheegtay inay la hadashay illaa 12 qof oo ay ku jiraan dhibanayaal, qaraabadooda iyo goobjoogayaal, waxayna hay’addu eegtay oo falanqeysay sawirada dayax gacmeedka iyo sawirada jajabyada hubka si loo ogaado isticmaalka bambooyinka ay soo saarto Turkey iyo diyaaradaha aan duuliyaha lahayn ee Bayraktar TB2.
Dowladda Soomaaliya ayaa sheegtay in howlgal lagu beegsaday Al-Shabaab ay ka fuliyeen isla deegaanka tuullada Baqdaad ee gobolka Shabeellaha Hoose, balse ma aysan sheegin dad rayid ah oo ku dhintay.
Amnesty ayaa sheegtay in ay ka codsatay dowladda Soomaaliya iyo Turkiga in faah faahin dheeri ah laga bixiyo balse aysan wax jawaab ah ka helin.
Dowlada Soomaaliya ayaan weli ka jawaabin warbixinta hay’adda Amnesty International, balse wali wax jawaab ah kama aanan helin.
Hase yeeshee, Dowaldda Soomaaliya ayaa sheegtay in 24 ka mid ah al-Shabaab lagu dilay howlgalka ka dhacay deegaanka Baldooska, halka 15 kale lagu dilay duqeyn cirka ah oo ka dhacday Baqdaad.
