Madaxweynaha Mareykanka, Donald Trump ayaa ku hanjabay toddobaadkan inuu jarayo kaalmada maaliyadeed ee la siiyo Afgaanistaan, haddii aysan ururka Taalibaan ee hoggaamiya Afgaanistaan dib usoo celin qalabka militari ee Mareykanka uga soo tagay markii ay ka baxayeen sannadkii 2021.

Hubka Mareykanka uga soo tagay Afganistan ayaa qiimahooda lagu qiyaasay 7 bilyan oo dollar, agabkaa militari oo isugu jira ; diyaaradaha qumaatiga u kaca, gantaallada riddada dhexe , kuwa riddada dheer , gaadiid gaashaaman iyo qalab kale.

Ururka Taalibaan oo ka jawaabay hadalka Trump , waxaa ay si cad u sheegeen inaysan celin doonin hubkaa, taa beddelkeeda ay u baahanyihiin hub iyo agab kale oo militari si ay ula dagaallamaan kooxda Daacish ee weerarrada ka geysata gudaha Afgaanistaan, sida ay shabakada Bloomberg, ka soo xigatay sarkaal ka tirsan Taalibaan.

Dowladda Mareykanka , ayaa dalka Afganistan uga soo tagtay hub aad u badan, taangiyo iyo diyaarado dagaal, kuwaa oo qaarkood cilladeysnaan , lamana oga go’aan sida uu u saameyn doono kooxda Taalibaan.