Kuwait ayaa si khalad ah u soo ridday saddex diyaaradood oo dagaal oo Maraykan ah xilli ay socdeen iska horimaadyo firfircoon oo ay ku jireen weerarro ay Iiraan fulisay, sida ay shaacisay Mareykanka.
Taliska Dhexe ee Ciidamada Mareykanka ee United States Central Command (CENTCOM) ayaa xaqiijiyay in saddexda diyaaradood oo nooca F-15E Strike Eagle ah si khalad ah ay u rideen difaacyada cirka ee Kuwait. Taliska ayaa sheegay in lixda xubnood ee duuliyeyaasha iyo shaqaalaha saarnaa ay ku guuleysteen inay ku boodaan baarashuud, isla markaana xaaladdoodu ay deggan tahay.
War ka soo baxay CENTCOM oo ay soo xigatay wakaaladda wararka ee Tidningarnas Telegrambyrå (TT) ayaa lagu sheegay in “Kuwait ay qiratay dhacdadan, waxaana uga mahadcelineynaa dadaalka iyo taageerada ciidamada Kuwait ee howlgalka socda.”
Dhacdadan ayaa ka dhacday meel u dhow saldhig ciidan oo Mareykan ah aroortii hore ee Isniinta, marka loo eego waqtiga Sweden. Sababta rasmiga ah ee keentay in diyaaradaha la soo rido ayaa weli saacado badan aan si cad loo shaacin.
Warbaahinta ay ka mid tahay CNN ayaa baahisay muuqaallo muujinaya diyaarad dab qabsatay oo si wareeg ah hoos ugu soo dhacaysa, iyo muuqaal kale oo la rumeysan yahay inuu muujinayo mid ka mid ah duuliyeyaasha oo ku boodaya baarashuud.
