Dowladda Mareykanka ayaa qorsheyneysa in fallaagada Xuutiyiinta ee dalka Yemen ay u aqoonsato argagixiso.

Waxaa jiray digniino ah in haddii dowladda Mareykanka ay qaado tallaabadaas ay dhibaato u keeneyso gargaarka bani’aadanimo ee la siiyo dadka ku sugan Yemen oo ay aafeeyeen dagaalo sokeeye.

Xoghayaha arrimaha dibadda ee Mareykanka, Mike Pompeo oo haatan wakhtigiisu uu sii dhamaanayo waxaa uu sheegay in ujeedada tallaabadan ay tahay in lagu la xisaabatamo Xuutiyiinta oo uu sheegay inay geysteen weeraro ka baxsan dalka Yemen, kuwaas oo uu sheegay inay ku waxyeeleyeen dad rayid ah iyo maraakiib.

Qaar kamid ah hey’adaha gargaarka ee dalka Yemen waxay sheegeen inay ku qasaban yihiin inay joojiyaan gargaar ban’iaadanimo oo ay sheegeen inay ka wadaan goobo ay dadku macluul ugu dhimanayaan.

Afhayeen u hadlay Qaramada Midoobay waxaa uu sheegay inay iska caddahay in saameyn ba’an oo dhanka ban’aadanimada iyo mid siyaasadeed ba ay ka dhalan doonta go’aanka Mareykanka.

Sidookale madaxweynaha hey’adda IRC waxaa uu go’aanka wasaaradda arrimaha dibadda ee Mareykanka ku tilmaamay “mid siyaasadeysan”.

Hogaamiyaha Xuutiyiinta ayaa maamulka madaxweyne Trump oo muddo xileedkiisu uu ku egyahay 20-ka bishan Janaayo ku tilmaamay “kuwa argagixiso”.

Dalka Yemen ayaa tan iyo sanadkii 2015-ka, waxaa ka taagnaa dagaallo sokeeye kadib markii fallaagada Xuutiyiinta ay weerareen inta badan galbeedka dalkaas, waxaana taas ay keentay in isbaheysiga uu hogaaminayo Sacuudiga ay dalkaas ku qaadaan duulaan ka dhan ah kooxdaas oo ay doonayeen in ay awoodda markale dib ugu soo celiyaan dowladda madaxweyne Cabdrabbuh Mansuur Haadi.

Xulafada Sacuudiga ayaa mudadaas saanad ciidan ka helayay dalalka Britain, Mareykanka iyo Faransiiska, halka Iran ay beenisay in hub iyo tababaro ay siiso Xuutiyiinta.

Dagaalka Yemen ayaa la sheegaa inay ku dhinteen dad gaaraya 110 kun oo qof, sidookalena uu sababay wax ay Qaramad midoobay ku tilmaamtay dhibaata ban’iaadanimo tii ugu darneyd.

Boqolkiiba 80 dadka ku nool Yemen ayaa la sheegay inay u baahan yihiin gargaar bani’aadanimo.

Mike Pompeo ayaa sheegay in wasaaradiisa ay aqalka Kongreska ku wargelin doontaa tallaabada ay damacsan yihiin, waxaana uu sidookale sheegay in hogaamiyaha Xuutiyiinta Cabdul Malik al-Houthi uu noqon doonaan mid ay bartilmaameedsadaan Mareykanka.

Leave a Reply

Your email address will not be published. Required fields are marked *

*