Dowladda Iswiidhan ayaa ku dhawaaqday hindise sharciyeed cusub oo lagu adkeynayo shuruudaha lagu helo dhalashada Iswiidhan, kaas oo ay taageerayaan xisbiga Dimuqraadiyiinta Iswiidhan (SD). Sharcigan cusub wuxuu ka kooban yahay kordhinta muddada deggenaanshaha iyo in la waajibiyo imtixaano la xiriira luqadda Iswiidhishka iyo aqoonta bulshada.
Wasiirka Socdaalka, Johan Forssell, ayaa shir jaraa’id ku tilmaamay isbeddelladan kuwo “taariikhi ah”. Shirkan waxaa sidoo kale ka qayb galay Wasiirka Waxbarashada iyo Isdhexgalka, Simona Mohamsson (hoggaamiyaha xisbiga Liberal-ka), iyo wakiillo ka socday xisbiyada Christian Democrats (KD) iyo SD.
Forssell ayaa sheegay in sharciga hadda jira uu oggolaanayo in qofku helo dhalashada kadib shan sano oo keliya, xitaa haddii uusan aqoon luqadda Iswiidhishka ama uu ku jiro xabsi ku-meelgaar ah dacwad culus awgeed. Wuxuu carrabka ku adkeeyay in sharciga cusub uu arrintaas gebi ahaanba beddelayo.
Muddada Deggenaanshaha Oo La Kordhinayo
Sida ku cad soo jeedinta cusub, muddada deggenaanshaha aasaasiga ah ee lagu codsan karo dhalashada waxaa laga dhigayaa 8 sano, halkii ay hadda ka tahay 5 sano.
Dadka aan waddan lahayn (Stateless): muddada waxaa laga kordhinayaa 4 sano ilaa 5 sano
Qaxootiga siyaasadeed: muddada waxaa laga kordhinayaa 4 sano ilaa 7 sano
Muwaadiniinta waddamada Waqooyiga Yurub (Nordic): wax isbeddel ah laguma samayn shuruudahooda
Shuruudda “Dabeecad Wanaagsan” Oo La Adkeynayo
Mashruuca sharcigu wuxuu sidoo kale adkeynayaa waxa loo yaqaan shuruudda “dabeecad wanaag”, taas oo micnaheedu yahay in la kordhinayo muddada laga sugo qofka kadib marka lagu xukumo dembi, ka hor inta uusan dalban karin dhalashada.
Qiimeyntu waxay quseyn doontaa falal lagu sameeyay gudaha iyo dibadda Iswiidhan. Xitaa dambiyada ama dhaqanka xun ee ka dhacay waddan kale waa la tixgelin karaa. Waxaa ka mid ah “dhaqan xumo” arrimo sida deymo waaweyn oo aan la bixin ama amarro mamnuucaya la-xiriirka dad gaar ah.
Xisbiyada ku jira Heshiiska Tidö ayaa aad uga sii adkeeyay talooyinkii guddiga baaritaanka. Tusaale ahaan, qof lagu xukumo xabsi 4 sano ah waxaa laga doonayaa inuu sugo 15 sano kadib marka uu dhameysto xukunka, ka hor inta uusan codsan dhalashada, sida uu sheegay afhayeenka socdaalka ee SD, Ludvig Aspling.
Ugu dambayn, Forssell wuxuu yiri:
“Waa arrin macquul ah oo cadaalad ah in qof raba inuu noqdo muwaadin Iswiidhish ah laga filayo inuu ku hadlo luqadda Iswiidhishka, iskiis isu maareeyo, aqoon aasaasi ah u leeyahay dalka, kuna noolaado dabeecad wanaagsan.”
