Kumannaan shacab ah ayaa maanta dibed-bax baroordiiq ah u sameeyay macalli Samuel Paty kaas oo galabnimadii jimcaha uu bireeyay wiil 18 jir muslim ah oo asal ahaan kasoo jeeda dalka Ruushka.

Dadkan ayaa isugu soo baxay barxadda caanka ah ee  Place de la République, waxaana ay dibedbaxayaashu siteen sawirka macallinka iyo fiyoorayaal, waxaana loo qaaday heeso.

Dibedbaxa ayaa waxaa ka qeyb galay ra`iisal wasaaraha dalkaasi  Jean Castex.

Macallinka ayaa lagu gowracay bannaanka iskuulkii uu wax ka dhigayay oo ku yaal magaalo duleedka Paris ku taal.

Samuel Paty, oo 47 jir ahaa, ayaa dilkiisa loo aaneynayaa in uu ardaydiisa tusay dhowr jeer sawir gacmeed laga sameeyey Nebi Maxamed NNKH, waxaana gowracay wiil 18 jir ahaa oo asal ahaan kasoo jeeda Jamhuuriyadda Chechnya ee Ruushka. Wiilkan ayaa waxaa markii dambe toogasho ku dilay booliska.

Afhayeen u hadlay Safaaradda Ruushka ee magaalada Paris, Sergei Parinov ayaa wiilka magaciisa ku sheegay Abdullakh Anzorov.

Abdullakh Anzorov ayaa Faransiiska yimid 12 sano ka hor, markaasi oo uu ahaa 6 sano jiray islamarkaana qoyskiisa ay codsadeen magan-galyo, sida uu sheegay afhayeenka. Waxa uu intaas ku daray in Abdullakh uu deganaansho helay sanadkan.

Afhayeenka ayaa sidoo kale sheegay in wiilkaas uusan wax xiriir ah la lahayn safaaradda Ruushka.

“Muhiimadda ma ahan halka uu ku dhashay qofkan, balse waa waa goorta iyo sababta uu u qaatay fikradaha argagixisada,” ayuu yiri.

Dacwad oogayaasha ayaa sheegay in Abdullakh weerarka fuliyey uu doonayey inuu macallinka ku ciqaabo inuu sawir gacmeed loola jeedo Nebi Muxamed NNKH tusay ardaydiisa.

Dacwad oogayaasha ayaa sidoo kale xiray laba nin oo mid canugiisa uu dhigto iskuulka, kan kalena ay isha ku hayeen sirdoonka, kuwaasi oo la sheegay inay baraha bulshada ka billaabeen olole ka dhan ah macallinka la gowracay.

Tan iyo horraantii bishan October ayaa la sheegay in baraha bulshada uu ka socday olole ka dhan ah macallinka sameeyey sawir gacmeedka, islamarkaana waalidiin badan oo Muslimiin ah ay uga soo dacwoodeen Iskuulka.

Ma aheyn markii koowaad ee Samuel Paty uu ardaydiisa tuso sawir gacmeedka rasuulka NNKH, waxaana la sheegay in sidoo kale uu sidaas sameeyey sanadkii tegay, sida laga soo xigtay mid ka mid ah ardaydiisa oo 13 jir ah.

Qaar ka mid ah shaqaalaha Iskuulka ayaa isku dayey inay xaliyaan muranka arrintan ka dhashay, waxayna u yeereen waalidiinta Muslimiinta ah, hase yeeshee waxay sheegeen inaysan kulanka iman.

Samuel Paty ayaa ugu dambeyn la dilay Jimcihii, kadib markii uu soo weeraray wiilka 18 jirka ah, kaasi oo mindi ku dhuftay kadibna gowracay.

Leave a Reply

Your email address will not be published. Required fields are marked *

*