DUBLIN, Ireland – Maxkamad ku taalla Ireland ayaa 18 bilood oo xabsi ah ku xukuntay Muna Mohamed Sharif, oo ah haweeney Soomaaliyeed oo 47 jir ah kana shaqeysa daryeelka caafimaadka, isla markaana deggen magaalada Birmingham ee dalka UK, kadib markii ay qiratay inay walaasheed ka caawisay inay Ireland ku gasho baasaboor Swedish ah oo uu lahaa qof kale.
Sharif ayaa lagu qabtay Garoonka Diyaaradaha ee Dublin 10-kii Abriil 2026, iyadoo iyada iyo walaasheed ay si gooni-gooni ah uga gudbeen kontoroolka socdaalka. Saraakiisha ilaalada xuduudaha ayaa ka shakiyay kadib markii ay arkeen labada haween oo is garanaya isla markaana isha isku haya xilli ay marayeen baaritaanka.
Baaritaannada ayaa lagu ogaaday in walaasheed ay adeegsatay baasaboor rasmi ah oo Swedish ah oo uu lahaa qof muuqaal ahaan u eg, balse aan ahayn baasaboor been abuur ah. Booliska Ireland (Garda) ayaa sheegay in caddeymo laga helay taleefanka Haweeneyda ay muujiyeen inay bixisay baasaboorka isla markaana ay xiriir la lahayd milkiilihii saxda ahaa ee baasaboorka.
Kadib markii ay gashay Ireland, haweeneyda ayaa codsatay magangelyo iyadoo dalbatay ilaalin caalami ah.
Qareennada Sharif ayaa maxkamadda u sheegay inay falka u sameysay naxariis darteed, ee aysan dhaqaale uga faa’iideysan, iyagoo sheegay in haweeneyda ay tahay walaasheed isla markaana ay ka baxsaneysay guur qasab ah oo Soomaaliya ka dhacay.
Maxkamadda ayaa ugu dambeyn Muna ku xukuntay 18 bilood oo xabsi ah kadib markii ay qiratay dambiga ah inay fududeysay gelitaanka sharci darrada ah ee Ireland.
