Shirkadda tagaasida ee laga leeyahay dalka Vietnam, Green SM (Green and Smart Mobility), ayaa isu diyaarinaysa inay soo gasho suuqa Sweden, kadib markii ay si rasmi ah uga hawlgashay Denmark. Tallaabadan ayaa dhalisay su’aalo ku saabsan sida ay u saameyn karto qiimaha adeegyada tagaasida, xaaladaha shaqo ee darawallada iyo tartanka ka jira warshadaha tagaasida ee Sweden.
Shirkadda waxaa iska leh kooxda weyn ee Vingroup, oo sidoo kale soo saarta baabuurta korontada ku shaqeysa ee VinFast. Green SM waxay diiradda saartaa adeegyada tagaasida ee isticmaala baabuurta korontada ku shaqeysa, iyadoo si xawaare leh u ballaarinaysa howlaheeda dalalka Waqooyiga Yurub.
Sida ay dhowaan qortay warbaahinta Danish-ka ee Ingeniøren, Green SM waxay Denmark ka bilaabaysaa adeeg ay ku shaqeynayaan ilaa 600 baabuur oo koronto ku shaqeeya, kuwaas oo horey loo geeyay dalkaas. Shirkaddu waxay sidoo kale qorsheyneysaa inay shaqaaleysiiso ku dhowaad 3,000 darawal oo tagaasi.
Maamulaha cusub ee Green SM ee Denmark, Lauge Brænder, ayaa sheegay in shirkaddu diyaar u tahay inay si dhakhso leh u bilowdo adeeggeeda, inkastoo uusan shaacin taariikhda rasmiga ah ee furitaanka.
Kadib ballaarinta Denmark, Green SM ayaa hadda indhaha ku haysa Sweden. Waxaa dhowaan magaalada Stockholm laga diiwaangeliyay shirkadda Green SM Sweden, taasoo muujinaysa in shirkaddu isu diyaarinayso inay si rasmi ah uga hawlgasho suuqa Sweden.
Khubarada ayaa aaminsan in soo gelitaanka shirkaddan cusub uu kordhin karo tartanka, isla markaana uu saameyn ku yeelan karo qiimaha adeegyada tagaasida iyo fursadaha shaqo ee darawallada dalka Sweden.
