Migrationsverket ayaa go’aamisay in ilmo 8 bilood jir ah laga tarxiilo dalka Iswiidhan loona celiyo Iiraan, sida ay werisay Sveriges Radio.
Waalidiinta ilmaha, oo u dhashay Iiraan, waxay haystaan oggolaansho shaqo (arbetstillstånd) oo u saamaxaya inay ku noolaadaan kuna shaqeeyaan Iswiidhan. Ilmuhu wuxuu ku dhashay gudaha Iswiidhan.
Wasiirka Socdaalka ee Iswiidhan, Johan Forssell (M), ayaa sheegay in arrintani ay u muuqato mid aan macquul ahayn.
– “Waxay ila tahay arrin aan la aqbali karin sida ay dad badani u arkaan,” ayuu yiri wasiirku.
Waalidiintu markii hore waxay codsadeen magangelyo, balse markii dambe waxay adeegsadeen nidaam loo yaqaan “spårbyte,” kaas oo u oggolaanayay qofka magangelyo-doonka ah inuu u beddesho codsigiisa mid shaqo, haddii uu shaqo helo. Sidaas ayay ku heleen sharci ay ku joogaan dalka.
Si kastaba ha ahaatee, bishii Abriil ee sanadkii hore, dowladda Iswiidhan waxay meel marisay isbeddel sharci ah oo meesha ka saaray suurtagalnimada spårbyte. Isbeddelkan cusub wuxuu sidoo kale saameeyay xubnaha qoyska ee dadka adeegsaday nidaamkaas, kuwaas oo aan hadda si toos ah u heli karin deganaansho.
Kiiskan gaarka ah, ilmaha yar waxaa loo aqoonsaday inuu yahay xubin qoys (anhörig), taasoo sababtay go’aanka tarxiilka.
Go’aanka ayaa kiciyay dood ku saabsan sida sharciyada cusub u saameynayaan carruurta ku dhalatay Iswiidhan, gaar ahaan marka waalidiintu haystaan oggolaansho shaqo oo sharci ah.
Arrintan ayaa weli si weyn looga hadal hayaa warbaahinta iyo bulshada dhexdeeda.
