Madaxweynaha Soomaaliya, Xasan Sheekh Maxamuud, ayaa khudbadii uu maanta ka hor jeediyay Baarlamaanka Federaalka ku sheegay in dowladda ay ka go’an tahay in lagu xalliyo khilaafaadka siyaasadeed ee kala dhexeeya maamul goboleedyada Puntland iyo Jubbaland iyadoo loo marayo wadahadal, is-qancin iyo xal waara oo ku saleysan mas’uuliyad qaran.
Madaxweynaha ayaa tilmaamay in labada maamul (Puntland iyo Jubbaland) ay ka fogaadeen Golaha Wadatashiga Qaran, hase yeeshee ay dowladda dhexe wado dadaallo miro dhal leh oo lagu doonayo dib u soo celinta kalsoonida iyo wada shaqeynta, si looga shaqeeyo midnimo qaran iyo danta guud ee ummadda Soomaaliyeed.
“Waxaan dadaal ugu jirnaa walaalaha ka gows qabtay Golaha Wadatashiga Qaran (Puntland iyo Jubbaland) sidii aan u raadin laheyn,” ayuu yiri Madaxweyne Xasan, isagoo intaas ku daray in xilka uu hayo iyo doorka odaynimo ee laga rabo hoggaanka qaranku ay u diidayaan in la iska indho tiro cabashooyinka ama tabashooyinka jira.
Madaxweyne Xasan Sheekh ayaa muujiyay in dowladda aysan dooran dagaal siyaasadeed, balse ay u taagan tahay xal u helidda khilaafaadka si masuuliyadi ku jirto, isagoo yiri: “Maqaamka iyo mas’uuliyadda lagu kabay odaynimo ayaa na faraya inaan qof kasta wax tabanaya aan raadino waana ku sii soconeynaa.”
Waxa uu carrabka ku adkeeyay in xalka uu ku jiro wadahadal, is-qancin iyo is-afgarad, taasoo lagu xallin karo khilaafaadka siyaasadeed ee u dhexeeya dowladda dhexe iyo maamul goboleedyada.
