Go’aanka ayaa yimid iyadoo uu socdo baaritaan la xiriira tuhunno ku saabsan wax-is-daba-marin doorasho oo ka dhacay magaalada Borlänge.
Tani waa markii ugu horreysay ee Xisbiga Bidixda uu si rasmi ah uga hadlo arrintan. Xoghayaha xisbiga, Maria Forsberg, ayaa sheegtay in xisbigu uu Ali kala heshiiyey inuusan xilkiisa baarlamaanka bilaabin inta uu baaritaanku socdo.
“Waxay ku saabsan tahay eedeymo aad u culus oo khuseeya dhammaan dadka arrintan lala xiriirinayo. Haddii aan si uun uga caawin karno baaritaanka, waan sameyn doonnaa,” ayay tiri Forsberg.
Waxay sidoo kale sheegtay in Xisbiga Bidixda uu arrinta si aad ah u qaadanayo, isla markaana uu soo dhoweynayo baaritaanka socda, sida ay werisay wakaaladda wararka TT.
Booliiska Qaranka ayaa la wareegay baaritaanka
Qaybta Qaranka ee Hawlgallada Booliiska Sweden, NOA, ayaa la wareegtay baaritaanka tuhunka wax-is-daba-marinta doorashada ee Borlänge. Sida laga soo xigtay TT, kooxda NOA ee qaabilsan la-dagaallanka musuqmaasuqa ayaa hoggaamin doonta shaqada baaritaanka.
Xeer-ilaalintu waxay hore u bilowday baaritaan hordhac ah oo ku saabsan tuhun la xiriira wax-is-daba-marin doorasho oo ka dhacday gobolka Dalarna. Arrintu waxay khuseysaa warqado codbixin oo doorashada baarlamaanka ah oo horay loo calaamadeeyay.
Sida ku cad warbixin aan la shaacin cidda soo gudbisay oo baaritaanku ku salaysan yahay, waxaa la tuhunsan yahay in cod-bixiyeyaal loo kaxeeyay goobaha codbixinta hore, halkaas oo la siiyay warqado codbixin oo horay loo calaamadeeyay.
